我嘅職業係：代孕媽媽（上）
我有咗BB。
我唔知BB嘅爸爸係邊個，呢種情況並唔罕見。
但我亦唔知BB嘅媽媽係邊個，我只能確定，唔係我。
我係一個代孕媽媽，或者，「媽媽」呢個咁高貴嘅稱呼，唔應該擺落我身上。
我叫阿雯，係一個冇家底冇學歷冇姿色，仲有啲懶嘅女人。
出到嚟城市，我去咗工廠打工。
工廠嘅工作又悶又辛苦，份糧交完租食完飯，就所剩無幾。
我想撈偏門㗎，之前有夜總會請小姐，我都有去應徵。
但未入到門口，就俾保安截住咗。
「你咁嘅樣，做洗廁所嘅阿嬸都影響市容啦。」
後來，有個朋友介紹份好工畀我，只需要做一年，就可以賺到六位數。
「即係幫人生仔？」我有啲猶豫：「但我連做雞都冇人要，人哋真係唔會嫌我醜，影響下一代？」
朋友講咗一大輪，話咩精子卵子都係由客戶提供，所以個仔唔會有我嘅DNA……
我細個冇讀書，佢講嘅嘢我都聽唔明，總之幫人生個仔，就可以賺一大筆錢。
有咗呢筆錢，我就可以享受吓人生，可以做吓小生意，總之唔駛做工廠妹。
我好爽快咁應承咗，簽咗合同，合同嘅條款密密麻麻，我都唔太明白，不過我一個鄉下妹，要錢就冇，要命一條，人哋都冇咩好呃。
去到「準備生仔」嗰日，我特登買咗一條好少布嘅裙，搽咗胭脂，希望嗰個「用咁多錢搵人生仔」嘅客人會睇中我，直接娶埋我做老婆。
但我去到目的地，等待我嘅唔係一個富有嘅男人，而係戴住口罩嘅醫生護士，同一堆冰冷嘅儀器。
我按照佢哋嘅吩咐，瞓上病床。
佢哋幫我打咗一支針，將我嘅下半身麻醉。
我個人仲係清醒嘅，我見到佢哋好似一個個機械人一樣，表情麻木，喺我下身做一啲奇怪嘅動作。
唔知過咗幾耐，醫生話，搞掂啦。
我問：「我有BB啦？」
「冇錯，胚胎已經植入子宮，約番個時間嚟覆診。」
我嘅心情就同我嘅小腹一樣咁麻木，最後我只可以答：「哦。」
但一切嘅困惑同迷茫，都喺收咗第一期嘅人工後，煙消雲散。
從來冇用過智能手機嘅我，買咗一部蘋果手機。
手機裡面有好多嘢睇，有好多娛樂，同沉悶單調嘅現實完全唔同。簡直好似係另一個世界。
所以，當我確定懷孕，代孕中介通知我，要去代孕宿舍度住，我一啲都冇反抗。
「好似員工宿舍咁囉，你以前冇生過仔，未必識點樣照顧自己。」
中介解釋：「我哋將所有代孕媽媽集中喺宿舍度，營養師規劃好餐單，仲有醫生睇住，好安全。」
即係包食包住，咁又慳番一大筆錢，我當然同意。
我帶住少量行李，搬入代孕宿舍。
我認識咗其他代孕媽媽，好多人都唔太鍾意宿舍嘅安排，話覺得自己冇晒自由。
我就覺得冇所謂啦，拎住部新手機，咩都有得睇、咩都可以上網買，有咩必要成日出去？
我日日喺宿舍玩手機，個肚亦漸漸隆起。
我有少少孕吐，但情況唔算嚴重，同埋宿舍24小時都有醫生，健康上冇乜問題。
但一切一切，由我第一次感受到胎動後，開始有變化。
我呆咗，我放低手機，細細力摸自己個肚。
個肚冇再郁，但我開始感覺到，一個小小嘅生命，喺我身體裡面漸漸成長。
自此之後，我每日都會摸吓個肚，細細聲同BB傾吓計。
有一次，醫生幫我照超聲波。
佢指住超聲波嗰張圖，話我知BB好健康，要我繼續努力保持呢個狀態。
我忍唔住問：「可唔可以畀咗我？」
「超聲波記錄？」醫生斷言拒絕：「梗係唔得啦，要寄番畀客人，畀佢哋睇住BB嘅成長㗎。」
「咁我可唔可以……影印……」我仲未問完，醫生就拎住超聲波記錄走咗。
另一個代孕媽媽勸我：「阿雯，你千祈唔好對個BB產生感情啊。」
「吓？」我一時反應唔過嚟。
「個BB唔係你個仔嚟㗎，佢一出世就會俾人抱走，佢大個咗完全唔會知道你嘅存在，都唔會似你。」
嗰個代孕媽媽分享佢嘅經歷，佢係第三次做代孕，第一次BB俾人抱走，佢幾乎崩潰。
但佢因為家庭問題，需要更多嘅錢，不得不再次做代孕，佢只好提醒自己，唔可以再對個BB產生感情。
佢語重心長咁講：「你每日好食好住，玩吓手機，好快就幾個月。其他嘢唔好諗，唔好想像BB大個咗之後會點……」
下集：https://bit.ly/2Y0EUWx
將專頁設定為「搶先看」/ "See first"，最新故仔馬上睇！
我係香香公主：https://goo.gl/5KqT4E
未來電筒：https://bit.ly/3csw61n
#短故 #短篇 #小說 #陳美濤 #廣東話 #粵語 #tomatochan #我嘅職業係代孕媽媽 #我嘅職業係
Search